نثار احمد
اسلام آباد……..پاکستان کے بڑے پیمانے کی صنعتی پیداوار میں مالی سال 2025-26 کے دوران گزشتہ مالی سال کے مقابلے میں 4.98 فیصد اضافہ ہوا۔ گاڑیاں، خوراک، ملبوسات، پٹرولیم مصنوعات اور سیمنٹ پیداوار میں اضافے کے نمایاں شعبے رہے۔پاکستان ادارہ شماریات کے جاری کردہ تازہ عبوری اعداد و شمار کے مطابق جولائی 2025 سے جون 2026 تک بڑی صنعتوں کی پیداوار کا اشاریہ 120.55 رہا جبکہ گزشتہ مالی سال کے اسی عرصے میں یہ 114.83 تھا۔گاڑیوں کی پیداوار میں سب سے زیادہ 57.77 فیصد اضافہ ہوا۔ دیگر ٹرانسپورٹ آلات کی پیداوار 42.36 فیصد جبکہ برقی آلات کی پیداوار 14.25 فیصد بڑھی۔پٹرولیم اور کوک کی مصنوعات کی پیداوار میں 9.70 فیصد اضافہ ہوا، سیمنٹ کی پیداوار 7.36 فیصد، ملبوسات 5.49 فیصد اور خوراک کی پیداوار 7.03 فیصد بڑھی۔دیگر شعبوں میں مشروبات کی پیداوار 3.09 فیصد، تمباکو 12.61 فیصد، ربڑ کی مصنوعات 14.19 فیصد، تیار شدہ دھاتی مصنوعات 9.65 فیصد اور مشینری و آلات 2.95 فیصد بڑھے۔ فرنیچر کی پیداوار میں 22.69 فیصد جبکہ دیگر صنعتی مصنوعات، جن میں فٹ بال کی تیاری بھی شامل ہے، میں 16.62 فیصد اضافہ ریکارڈ کیا گیا۔مجموعی صنعتی ترقی میں سب سے بڑا حصہ گاڑیوں کا رہا جس نے مجموعی شرح نمو میں 1.56 فیصد پوائنٹس کا اضافہ کیا۔ خوراک کا حصہ 1.21 پوائنٹس، ملبوسات 0.91 پوائنٹس اور پٹرولیم مصنوعات 0.72 پوائنٹس رہا۔ سیمنٹ نے 0.41 پوائنٹس، برقی آلات نے 0.37 پوائنٹس، فرنیچر نے 0.28 پوائنٹس اور دیگر ٹرانسپورٹ آلات نے 0.27 پوائنٹس کا حصہ ڈالا۔تاہم جون میں صنعتی سرگرمی کمزور رہی۔ جون 2026 میں بڑی صنعتوں کی پیداوار کا اشاریہ 108.83 رہا جو جون 2025 کے مقابلے میں 3.48 فیصد اور مئی 2026 کے مقابلے میں 6.08 فیصد کم تھا۔دوسری جانب کئی اہم صنعتی شعبوں میں سالانہ بنیادوں پر کمی بھی ریکارڈ کی گئی۔ ٹیکسٹائل کی پیداوار 0.63 فیصد، کیمیکلز 2.53 فیصد، ادویات 8.87 فیصد اور لوہے و اسٹیل کی مصنوعات 7.84 فیصد کم ہوئیں۔ چمڑے کی مصنوعات میں 1.95 فیصد جبکہ لکڑی کی مصنوعات میں 0.45 فیصد کمی ہوئی۔اعداد و شمار کے مطابق مالی سال 2025-26 کے دوران خوراک، مشروبات، تمباکو، ملبوسات، کاغذ و گتہ، کوک و پٹرولیم مصنوعات، ربڑ، غیر دھاتی معدنی مصنوعات، تیار شدہ دھاتی مصنوعات، برقی آلات، مشینری، گاڑیوں، دیگر ٹرانسپورٹ آلات، فرنیچر اور دیگر صنعتی مصنوعات کی پیداوار میں اضافہ ہوا۔اس کے برعکس ٹیکسٹائل، چمڑے، لکڑی، کیمیکلز، ادویات اور لوہے و اسٹیل کی مصنوعات کی پیداوار میں کمی ریکارڈ کی گئی۔مجموعی طور پر گاڑیوں، خوراک، ملبوسات، پٹرولیم مصنوعات، سیمنٹ اور برقی آلات کے شعبوں میں نمایاں اضافے نے کئی دیگر شعبوں کی کمی اور جون میں صنعتی سرگرمی کی سست روی کے باوجود مالی سال 2025-26 میں بڑی صنعتوں کی مجموعی کارکردگی کو مثبت رکھنے میں اہم کردار ادا کیا۔
