کراچی: پاکستان سات بڑے شہروں میں آئندہ چند ماہ کے اندر 5G سروس متعارف کرانے جا رہا ہے۔ یہ اعلان وفاقی وزیر برائے انفارمیشن ٹیکنالوجی و ٹیلی کمیونیکیشن شزا فاطمہ خواجہ نے 26ویں آئی ٹی سی این ایشیا ایکسپو کی افتتاحی تقریب سے خطاب کرتے ہوئے کیا۔
وزیر کا کہنا تھا کہ اگرچہ ملک میں براڈ بینڈ صارفین میں اضافہ ہوا ہے لیکن 5G کی جانب منتقلی آسان نہیں ہوگی۔ انہوں نے مالی مشکلات، سمندری کیبلز پر انحصار (جن میں سے دو حال ہی میں جدہ کے قریب ریڈ سی میں متاثر ہوئیں) اور ڈیجیٹل انفراسٹرکچر میں مزید بہتری کی ضرورت کو بڑی رکاوٹیں قرار دیا۔
انہوں نے مزید بتایا کہ حکومت نے مصنوعی ذہانت (AI) پالیسی کی منظوری دے دی ہے، جس کے تحت رواں سال 5 لاکھ سے 10 لاکھ نوجوانوں کو مصنوعی ذہانت اور سائبر سیکیورٹی کی تربیت دی جائے گی تاکہ پاکستان نئی ٹیکنالوجی کے مواقع سے بھرپور فائدہ اٹھا سکے۔
وزیر نے ملک بھر میں تیز اور قابل اعتماد انٹرنیٹ کی فراہمی پر بھی زور دیا اور کہا کہ فائبر نیٹ ورک کا اضافہ، سب میرین کیبلز کی صلاحیت میں توسیع اور براڈ بینڈ ڈھانچے کو بہتر بنانا حکومت کی اولین ترجیحات ہیں۔
