سٹاک ہوم انٹرنیشنل پیس ریسرچ انسٹیٹیوٹ (SIPRI) کی تازہ رپورٹ کے مطابق 2024 میں دنیا بھر کے فوجی اخراجات 2.7 کھرب ڈالر کی ریکارڈ سطح تک جا پہنچے ہیں۔ رپورٹ کے مطابق دنیا کے 100 سے زائد ممالک نے اپنے دفاعی بجٹ میں اضافہ کیا، جن میں یورپی ممالک اور مشرقِ وسطیٰ کے خطے نمایاں ہیں۔
رپورٹ میں بتایا گیا ہے کہ بڑھتے ہوئے جغرافیائی تناؤ، علاقائی تنازعات اور سلامتی کے خطرات کے پیشِ نظر بیشتر ممالک نے اپنی دفاعی صلاحیتوں کو مزید مضبوط کرنے پر زور دیا۔ یورپ میں یوکرین جنگ اور سیکیورٹی خدشات جبکہ مشرقِ وسطیٰ میں جاری تنازعات کو بجٹ میں اضافے کی بڑی وجوہات قرار دیا گیا ہے۔
ماہرین کے مطابق عالمی سطح پر فوجی اخراجات میں یہ اضافہ نہ صرف عالمی سلامتی کے خطرات کو بڑھا رہا ہے بلکہ معاشی چیلنجز اور ترقیاتی منصوبوں کے لیے وسائل میں بھی کمی کا باعث بن سکتا ہے۔ تجزیہ کاروں نے خبردار کیا ہے کہ اگر یہ رجحان جاری رہا تو دنیا ایک نئے ہتھیاروں کی دوڑ میں داخل ہو سکتی ہے۔
(بشکریہ: بی بی سی)
