سردیوں میں قوتِ مدافعت بڑھانے کے چھ مؤثر طریقے:

موسمِ سرما کے آغاز کے ساتھ ہی نزلہ، زکام اور فلو جیسی بیماریاں عام ہو جاتی ہیں۔
طبی ماہرین کے مطابق اس موسم میں صحت مند رہنے کے لیے صرف احتیاطی تدابیر نہیں بلکہ قوتِ مدافعت (امیون سسٹم) کو مضبوط بنانا بھی بے حد ضروری ہے۔

ماہرینِ تغذیہ نے سردیوں میں قوتِ مدافعت بڑھانے کے لیے چھ مؤثر عادات اپنانے کا مشورہ دیا ہے،
جن پر عمل کر کے جسم کو بیماریوں کے خلاف بہتر تحفظ دیا جا سکتا ہے۔

غذاؤں میں رنگ شامل کریں

پھل، سبزیاں، مکمل اناج، خشک میوہ جات اور بیج روزمرہ خوراک کا حصہ بنائیں۔
یہ غذائیں اینٹی آکسیڈنٹس فراہم کرتی ہیں جو جسم کو بیماریوں سے بچاتے ہیں۔
ماہرین کے مطابق روزانہ تین سے پانچ سرونگز پھل اور سبزیوں کی لینی چاہییں۔

روزانہ ورزش کو معمول بنائیں

ہفتے میں کم از کم 150 منٹ معتدل جسمانی سرگرمی جیسے تیز چہل قدمی یا ایروبک ورزش کرنا مفید ہے۔
ورزش سے خون کی روانی بہتر ہوتی ہے اور جسم کے دفاعی خلیے فعال رہتے ہیں۔

مناسب نیند لیں

پوری نیند نہ لینا جسم کو کمزور بناتا ہے۔
بالغ افراد کو روزانہ سات سے نو گھنٹے نیند لینے کی سفارش کی گئی ہے تاکہ مدافعتی نظام بہتر طور پر کام کرتا رہے۔

سپلیمنٹس کے استعمال میں احتیاط

قوتِ مدافعت بڑھانے والے سپلیمنٹس کے دعوے اکثر سائنسی بنیاد پر ثابت نہیں ہوتے۔
ماہرین کے مطابق بہتر ہے کہ قدرتی اور متوازن خوراک پر توجہ دی جائے۔
کسی بھی سپلیمنٹ کے استعمال سے قبل ڈاکٹر یا ڈائیٹیشین سے مشورہ ضرور کیا جائے۔

ذہنی دباؤ کم کریں

مسلسل ذہنی دباؤ (Stress) امیون سسٹم کو کمزور کرتا ہے۔
مراقبہ، یوگا، گہری سانس کی مشقیں اور ہلکی ورزشیں ذہنی تناؤ کم کرنے میں مددگار ثابت ہو سکتی ہیں۔

پانی اور گرم مشروبات کا استعمال

سردیوں میں لوگ عام طور پر پانی کم پیتے ہیں، جو مدافعتی نظام پر اثر انداز ہوتا ہے۔
پانی کے ساتھ ساتھ سبز چائے، قہوہ اور گرم سوپ جیسے مشروبات جسم کو ہائیڈریٹ رکھنے میں مدد دیتے ہیں۔