الیکشن ٹریبونل پشاور کا فیصلہ؛ تیمور سلیم جھگڑا کی انتخابی عذرداری خارج، ن لیگ کے جلال خان کی کامیابی برقرار

الیکشن ٹریبونل پشاور نے پاکستان تحریک انصاف کے رہنما تیمور سلیم جھگڑا کی جانب سے دائر انتخابی عذرداری کو مسترد کرتے ہوئے خیبر پختونخوا اسمبلی کے حلقہ پی کے 79 سے مسلم لیگ (ن) کے امیدوار جلال خان کی کامیابی کو درست قرار دے دیا ہے۔ فیصلے کے مطابق، درخواست گزار قانونی تقاضے پورے کرنے میں ناکام رہے اور پٹیشن میں کئی سنگین تکنیکی غلطیاں پائی گئیں۔ جواب کنندہ کے وکیل نے عدالت کو آگاہ کیا کہ تیمور سلیم جھگڑا نے اپنی درخواست میں والد کا نام تک درست درج نہیں کیا تھا، جو کہ انتخابی قوانین کی صریحاً خلاف ورزی ہے۔ ٹریبونل نے اپنے ریمارکس میں واضح کیا کہ الیکشن رولز کے تحت انتخابی عذرداری دائر کرتے وقت تمام حقائق کو ریکارڈ پر درست لانا لازمی ہوتا ہے، تاہم درخواست گزار نے دیگر ضروری قانونی ضوابط کو بھی نظر انداز کیا۔ عدالت نے قرار دیا کہ ایسی تکنیکی خامیوں کی موجودگی میں کارروائی کو آگے نہیں بڑھایا جا سکتا، لہٰذا پٹیشن خارج کی جاتی ہے اور جلال خان کی بطور رکن صوبائی اسمبلی حیثیت برقرار رہے گی۔