ممبئی: گلوکار اور اداکار دلجیت دوسانجھ نے اپنی فلم سردار جی 3 میں پاکستانی اداکارہ ہانیہ عامر کی شمولیت پر ہونے والی تنقید پر بالآخر خاموشی توڑ دی۔
فلم کی شوٹنگ حملے سے پہلے ہوئی تھی
ملائشیا میں کنسرٹ کے دوران خطاب کرتے ہوئے دلجیت دوسانجھ نے کہا کہ سردار جی 3 کی شوٹنگ فروری میں مکمل ہوئی تھی، جو پہلگام کے افسوسناک واقعے اور پاک-بھارت میچ سے پہلے کا وقت ہے۔
بھارتی پرچم کو سلامی
کنسرٹ کے دوران وائرل ویڈیوز میں دلجیت دوسانجھ کو بھارتی جھنڈے کے سامنے احتراماً سلامی دیتے اور شائقین کو ملک کے وقار اور عزت کی اہمیت یاد دلاتے ہوئے دیکھا گیا۔ انہوں نے کہا: “یہ میرے دیش دا جھنڈا ہے، ہمیشہ احترام کریں۔”
خاموشی کی وجہ
دلجیت دوسانجھ نے کہا کہ شروع میں وہ اس تنازعے پر خاموش رہے کیونکہ وہ معاملے کو مزید بڑھانا نہیں چاہتے تھے۔ ان کا کہنا تھا:
“میرے پاس بہت سے جواب تھے مگر میں نے سب اپنے دل میں رکھے۔ کوئی بھی کچھ کہے تو اسے زہر کی طرح دل میں نہ بسائیں۔”
دعا اور ذمہ داروں کو سزا کی خواہش
انہوں نے مزید کہا: “ہم نے اُس وقت بھی دعا کی تھی اور آج بھی دعا کر رہے ہیں کہ اس واقعے کے ذمہ داروں کو سخت سزا ملے۔ اہم بات یہ ہے کہ میری فلم اُس واقعے سے پہلے فلمائی گئی تھی۔”
پس منظر
یاد رہے کہ دلجیت دوسانجھ کو اس وقت شدید تنقید کا سامنا کرنا پڑا جب پاک-بھارت کشیدگی کے دوران انہوں نے پاکستانی اداکارہ ہانیہ عامر کو فلم سردار جی 3 میں کاسٹ کیا۔ بعض ممالک نے فلم پر پابندی لگا دی، تاہم پاکستان سمیت کئی ملکوں میں فلم ریلیز ہوئی اور مقبولیت حاصل کی۔
