پنجاب میں 8 اقسام کی غیر معیاری ادویات پر پابندی، مارکیٹ سے فوری واپسی کا حکم

ڈائریکٹوریٹ آف ڈرگ کنٹرول اتھارٹی پنجاب نے انسانی صحت کے تحفظ کو یقینی بنانے کے لیے صوبے بھر میں 8 اقسام کی مختلف ادویات کے مخصوص بیچز کی فروخت پر فوری پابندی عائد کرتے ہوئے انہیں مارکیٹ سے واپس لینے کے احکامات جاری کر دیے ہیں۔ اتھارٹی کی جانب سے جاری کردہ الرٹ میں واضح کیا گیا ہے کہ ڈرگ ٹیسٹنگ لیبارٹری کی رپورٹ کے مطابق یہ ادویات معیار پر پورا نہیں اترتیں اور ان میں سے بعض نمونے طاقت کے ٹیسٹ میں ناکام، غیر معیاری، ملاوٹ شدہ یا ڈرگ ایکٹ کے برخلاف غلط لیبلنگ کے حامل پائے گئے ہیں۔ اس سنگین صورتحال کے پیش نظر ڈیلرز، ہول سیلرز اور ریٹیلرز کو سختی سے ہدایت کی گئی ہے کہ وہ متاثرہ بیچز کا اسٹاک فوری طور پر فروخت سے ہٹا دیں اور اس کی مکمل تفصیلات متعلقہ ڈرگ انسپکٹر کو فراہم کریں۔ اتھارٹی نے عوام الناس کو بھی خبردار کیا ہے کہ وہ ان ادویات کے استعمال سے مکمل گریز کریں کیونکہ غیر معیاری ادویات کا استعمال صحت کے لیے شدید خطرات اور پیچیدگیوں کا باعث بن سکتا ہے۔ دوسری جانب طبی ماہرین نے موجودہ سرد موسم کے پیش نظر شہریوں کو احتیاطی تدابیر اختیار کرنے کا مشورہ دیا ہے تاکہ موسمی بیماریوں سے بچا جا سکے۔ ماہرین کے مطابق نزلہ اور زکام میں مبتلا افراد سے ہاتھ ملانے سے گریز کرنا چاہیے اور سماجی فاصلہ برقرار رکھنے کے ساتھ ساتھ ماسک کا استعمال یقینی بنایا جائے۔ مزید برآں شہریوں کو تاکید کی گئی ہے کہ وہ اپنی روزمرہ خوراک میں متوازن اور صحت بخش غذاؤں کو شامل کریں تاکہ جسمانی قوت مدافعت مضبوط رہے اور وائرل انفیکشنز کے خلاف بہتر مدافعت پیدا ہو سکے۔