اسلام آباد: نادرا نے پاکستانی شہریوں اور اوورسیز پاکستانیوں کے لیے ایک نئی سہولت متعارف کرا دی ہے جس کے تحت شناختی دستاویزات اب گھر بیٹھے حاصل کیے جا سکیں گے۔ نادرا کی پاک آئی ایپ کے ذریعے شہری نیا شناختی کارڈ بنوانے، تجدید، ترمیم، منسوخی، دوبارہ اجرا اور کھو جانے کی صورت میں ری پرنٹ کے لیے درخواست دے سکتے ہیں۔ اس کے ساتھ ساتھ فیملی رجسٹریشن سرٹیفیکیٹ اور چائلڈ رجسٹریشن سرٹیفیکیٹ بھی آن لائن حاصل کیے جا سکیں گے۔
نادرا کے مطابق یہ ایپ شہریوں کو اکاؤنٹ بنانے اور بایومیٹرکس (انگلیوں کے نشانات یا چہرے کی شناخت) کے ذریعے محفوظ لاگ ان کی سہولت فراہم کرتی ہے۔ صارفین اپنے موبائل کیمرے کے ذریعے تصویر، فنگر پرنٹس اور ڈیجیٹل دستخط جمع کرا سکتے ہیں، جبکہ مطلوبہ دستاویزات موبائل کیمرے یا فائل اپ لوڈ کے ذریعے اپ لوڈ کی جا سکتی ہیں۔
ایپ میں صارف پر مبنی ان باکس بھی موجود ہے جس میں تمام درخواستوں کی تفصیل اور اسٹیٹس دکھائی دیتا ہے۔ تصدیق کے لیے ون ٹائم پاس ورڈ کا نظام موجود ہے اور فیس کی ادائیگی بھی آن لائن کی جا سکتی ہے۔
نادرا حکام کا کہنا ہے کہ اس ایپ کی بدولت شہریوں کو دفاتر کے چکر لگانے کی ضرورت نہیں رہے گی اور انہیں شناختی کارڈ سمیت دیگر دستاویزات کے لیے ایک تیز، آسان اور محفوظ آن لائن نظام میسر آ جائے گا۔ یہ سہولت خاص طور پر اوورسیز پاکستانیوں کے لیے انتہائی معاون ثابت ہوگی۔
