دبئی: پاکستان اور بھارت کی کرکٹ ٹیمیں آج ایشیا کپ 2025 کے تاریخی فائنل میں آمنے سامنے ہوں گی۔ یہ ایشیا کپ کی 41 سالہ تاریخ میں پہلا موقع ہے جب دونوں روایتی حریف ٹیمیں فائنل میں ٹکرا رہی ہیں۔
کھلاڑیوں کا عزم
پاکستانی ٹیم نے ہفتے کے روز دبئی میں بھرپور پریکٹس کی۔ کپتان سلمان علی آغا نے پریس کانفرنس میں کہا:
“ایشیا کپ جیتنے آئے تھے، جیت کر جائیں گے۔ ٹیم پر اعتماد ہے کہ وہ فائنل میں شاندار کارکردگی دکھائے گی۔”
ایونٹ میں اب تک کی کارکردگی
ایشیا کپ 2025 میں بھارت نے پاکستان کو دونوں گروپ میچز میں شکست دی، تاہم گرین شرٹس نے اس کے بعد ایونٹ میں شامل باقی تمام ٹیموں کو شکست دے کر فائنل تک رسائی حاصل کی۔
ماضی میں دونوں ٹیمیں کسی بھی انٹرنیشنل ایونٹ کے فائنل میں پانچ بار آمنے سامنے آ چکی ہیں، جن میں پاکستان نے تین جبکہ بھارت نے دو بار کامیابی حاصل کی۔
ممکنہ پاکستانی ٹیم
ذرائع کے مطابق فائنل میں وہی پلیئنگ الیون میدان میں اترے گی جس نے سیمی فائنل میں بنگلہ دیش کو شکست دی تھی۔
ممکنہ پلیئنگ الیون:
صاحبزادہ فرحان، فخر زمان، صائم ایوب، سلمان علی آغا (کپتان)، حسین طلعت، محمد حارث، محمد نواز، فہیم اشرف، ابرار احمد، شاہین شاہ آفریدی، حارث رؤف۔
کرکٹ شائقین کی توقعات
کرکٹ کے دیوانے شائقین اس میچ کو ایک بڑے معرکے کے طور پر دیکھ رہے ہیں۔ اس تاریخی فائنل میں اسٹیڈیم بھر چکا ہے جبکہ دنیا بھر میں لاکھوں افراد ٹی وی اسکرینز پر یہ مقابلہ دیکھنے کے منتظر ہیں۔
