*اسلام آباد (واج نیوز ڈیسک) ** محکمہ موسمیات نے بلوچستان کے خشک سالی کے شکار علاقوں میں دسمبر کے دوران گرج چمک کے ساتھ شدید بارشوں کی پیشگوئی کی ہے۔ ادارے کے مطابق مغربی ہواؤں کا ایک طاقتور سلسلہ *6 سے 10 دسمبر کے دوران بلوچستان میں داخل ہوگا، جو وقفے وقفے سے پورے مہینے جاری رہنے کا امکان ہے۔
بارشیں خشک سالی میں کمی کا سبب بنیں گی
محکمہ موسمیات کا کہنا ہے کہ متوقع بارشیں ژوب، شیرانی، موسیٰ خیل، بارکھان، کوہلو، سبی، لسبیلہ، آواران، کیچ، گوادر، پنجگور، خضدار، قلعہ سیف اللہ، چاغی، نوشکی، واشک اور مستونگ سمیت بلوچستان کے بیشتر اضلاع میں خشک سالی کے خاتمے میں مددگار ثابت ہوں گی۔
ادارے کے مطابق مختلف مقامات پر گرج چمک کے ساتھ موسلا دھار بارشیں جبکہ بالائی علاقوں میں برف باری ہونے کا بھی امکان ہے۔
بارشوں کا سلسلہ طویل کیوں ہوگا؟
ماہرین کا کہنا ہے کہ اس سال شمال مغربی ہوائیں معمول سے زیادہ فعال ہیں اور عرب سمندر سے آنے والی نمی کا رخ بلوچستان کی جانب ہے، جس کی وجہ سے بارشوں کا سلسلہ طویل رہنے کا امکان ہے۔
ملک بھر میں موسم کی صورتحال
محکمہ موسمیات کے مطابق آئندہ 24 گھنٹوں کے دوران ملک کے بیشتر علاقوں میں موسم سرد اور خشک رہے گا، جبکہ پہاڑی علاقوں میں رات اور صبح کے وقت شدید سردی برقرار رہے گی۔
پنجاب اور خیبر پختونخوا کے میدانی علاقوں میں صبح اور رات کے اوقات میں ہلکی سے درمیانی دھند چھانے کی توقع ہے۔
گزشتہ 24 گھنٹوں کے دوران ملک کے بیشتر علاقے خشک رہے، جبکہ پہاڑی علاقوں میں سردی کی شدت برقرار رہی۔ پنجاب کے بعض میدانی علاقوں میں ہلکی دھند بھی ریکارڈ کی گئی۔
